「由出世起，打到最後就為咗DSE（中學文憑試），考唔到大學就冇用！」職場獵頭人、人稱辣媽Son姐的張慧敏，罵盡港爸港媽這心態徒添下一代壓力。同樣是人母，女兒考不上大學，反鬆一口氣，「DSE考得唔好係閂咗佢個窗，但幫佢開咗度門」，她放手，讓女兒尋找自己的路。

記者：蕭洛汶

「成績係你平時有幾努力嘅真實反映，好多人話失手，喺我字典係冇失手！」Son姐狀似氣焰囂張，但60後的她自小深信，學業無法決定人的高低。那些年，會考失敗不是絕路，「零分咪零分，大家會接受現實，最多出嚟做嘢」，霸氣的Son姐，讀書時由「虎媽」控制，連選科亦沒選擇權，為逃離虎掌，她反其道而行，「以我能力，中英數冇A係冇可能，我係特登HEA考」，最終會考成績，理想地「不理想」，狠狠剪掉木偶線，虎媽無法再控制她。她最終成功到外國大學讀歷史、經濟、數學，「人生係可以轉軚」

讀書叻，未必要向上爬；讀書差，亦不一定沒路，這故事是女兒「大T」教懂她的。大T自小不愛讀書，升中學時哭着叫苦，Son姐安慰她：「媽咪都知讀啲嘢好戇居，但你唔能夠係文盲。」Son姐與大T約定，只要達基本語文能力，中學後不再讀書，Son姐絕不阻撓。

結果大T兩年前考文憑試，中文科不合格，無法直升大學，但Son姐縱使有經濟能力，亦不供女兒出國讀書，「你連興趣、能力喺邊都唔知，錢事小，嘥緊你時間好大鑊！」。最終女兒於韓國畢業旅行時發掘到未來方向，Son姐語帶驚嘆：「佢自學都用到韓文同人whatsapp講嘢」，大T最後到南韓學韓文，找到學習樂趣，去年更打破文憑試成績界限，考上梨花女子大學，「我諗佢21歲嘅人生，第一次為自己做到嘅嘢自豪」。

在Son姐眼中，不少香港學生缺乏女兒對學習的熱熾。她看到大部份學生考上大學，卻仍自信低落，因他們是為別人而活，「覺得上到大學都係二流大學，問佢點解讀？佢會話因為阿爸阿媽話讀。」