中央力撐上海2020年前成為國際金融中心，滬港交易所之爭再成城中熱話，但同樣喺各大金融市場工作過嘅陳子政（TC）同莊偉林（John）話，隨着中國經濟做大做強，交易所個餅只會越做越大。TC更認為，港交所唔使將上海作為假想敵，滬港應謀求雙贏發展。John亦話，唔同意滬港之間係零和遊戲，香港始終有更開放同更貼近國際資金嘅優勢。
講到香港監管水平有時未必足夠，但陳莊兩人就唔認同成立超級監管機構。TC話正如佢唔信全球一體化銀行概念一樣，事實證明唔可行，金融產品服務越趨複雜，佢相信獨立專門嘅監管機構，把關工作會做得好啲。John就話，超級監管機構唔係所有金融弊病嘅靈丹妙藥，現行監管架構運作同溝通相當良好，要改動先要周詳規劃。

季報唔係仙丹

至於等到頸長都未見推行日期嘅季度業績報告，TC話季報技術上冇可能做唔到，面世只係時間問題，雖然有助加強披露公司資訊，但佢表明唔會push，「美國早已有季報，佢冇出事冇fraud咩，季報唔係神丹妙藥。」John答季報可令投資者更了解公司，佢認同英式管治報告係較有效嘅處理辦法。