婚外情已經成為日本社會問題，由型男三浦翔平夥拍倉科加奈嘅不倫劇《奪愛、冬》後日開播，故事講男主角三浦翔平同未婚妻本來就快拉埋天窗，不過女方舊愛突然出現，發展出複雜嘅婚外情兼四角關係。

三浦翔平前日率領三位拍檔倉科加奈、水野美紀、大谷亮平開記者會宣傳，三浦翔平着西裝顯得十分有型，新劇相信可以吸納一班師奶粉絲捧場。其實28歲嘅三浦翔平唔止高大，仲練得一身肌肉，日前佢去夏威夷拍節目終有機會盡情露肉，佢喺Instagram上載當地靚相，每張都有十幾萬like。不過，三浦翔平半裸照公開後，有網民就覺得畫面構圖令人聯想起澳洲北領地袋鼠保護區（The Kangaroo Sanctuary）嘅「大隻」袋鼠Roger，仲話由身形到樣貌都毫無違和感。

提到袋鼠Roger，好多人都好關心Roger近況。從前年一張打凹鐵桶照片開始，Roger於網絡大熱，不過保護區指Roger已踏入晚年，去年底開始現老態，又有關節炎及視力退化，已經唔再戰鬥格。澳洲北領地袋鼠保護區facebook近日都有公開Roger消息及近照，噚日又貼11年前舊照，當時仲係袋鼠BB嘅Roger獲救時又奀又瘦，估唔到之後可以練得一身肌肉。