前大律師林作，開口埋口都係講女，加上前度係10A港姐冠軍麥明詩，可以理解到，呢兩屆港姐，林作係有幾重視。

以往港姐選舉當晚，林作都會坐定定對住螢光幕，邊睇邊貼心水佳麗，不過今屆選舉，佢竟然一反常態，喺fb留言「今年唔睇港姐，因為冇乜心水。雖然張寶欣擺明贏硬。」可惜林作最睇好嘅張寶欣，都係五強止步。

今屆港姐冠軍雷莊𠒇，由參選初賽頭一日，網民已經疑問點解會入到複賽，複賽再到決賽，雷莊𠒇過五關斬六將，結果喺選美台上，留守到最後一刻，最終摘冠。

網民對賽果嘖嘖稱奇，反觀林作，噚晚喺fb留咗四個字「實至名歸」？！

唔好驚訝住，再望望林作個post嘅hashtag「索_到」、「曲到圓」、「misshk」、「冠軍」。

Hashtag講得夠圓，但唔算玄，網民應該心領神會到。《蘋果》今日問林作點睇今屆港姐賽果，佢回覆話：「冠軍註定係風雲人物，太搶眼。因為今屆選舉係非民選，家財萬貫，加上大眾唔接受嘅外貌，相信佢會有個好勵志嘅生涯。由於冠軍太搶鏡，無法留意亞軍同季軍！」

講到網民批評港姐冠軍個樣，林作就話：「似乎市民係有共識，香港人一向眼睛係雪亮嘅，不過最重要係你見到一旦非民選嘅情況出現，係會令社會幾不安，反而樣嚟講，佢雖然唔係我嗰type，不過呢啲嘢，各花入各眼啦。」