海嘯殺萬人、中國人揚威雅典奧運、「六四」十五周年、梅艷芳喪禮……二○○四年嘅香港以至有中國人嘅地方，發生咗好多令人惋惜、驚歎及懷緬嘅事情，《蘋果日報》傾力為讀者作出全面和詳盡的報道，努力並得到同業嘅肯定認同。
一年一度嘅亞洲出版業協會頒獎禮，噚日喺港島金鐘嘅一間酒店內舉行，香港《蘋果》勇奪九個獎項，包括人權報道獎、評論獎、版面設計獎、新聞圖片獎、專題報道獎、政治漫畫獎，其中著名漫畫家尊子更加囊括所有中文報章嘅漫畫獎項；而台灣《蘋果》亦攞到一項最佳新聞圖片獎。剛啱今年係《蘋果》創刊十周年，真係可喜可賀。

大會今次請得特別嘉賓來頒獎，佢就係馬來西亞前副總理安華（AnwarIbrahim）。安華喺席上發表演講，批評好多亞洲國家政府假借孔子嘅儒家學說，來欺騙群眾，以團結國家為名，犧牲人民嘅人權同自由。佢認為，任何一個國家，好似中國咁，就算經濟發展得好快，但如果冇民主同自由，一定唔可以長治久安。安華又讚揚香港仍然係亞洲區中，最有新聞自由嘅地方。

傳真︰2623-9278
電郵︰[email protected]