【新增內容及圖片】
由韓劇《三流之路》男星朴敘俊跟女星朴敏英合作嘅tvN新劇《金秘書為何那樣》噚日開播，首集劇情就進展神速，朴敘俊第一集已向朴敏英求婚，令劇迷超級期待之後嘅劇情進展。

喺劇中朴敘俊飾演超自戀嘅集團副會長李英俊，朴敏英飾演喺朴敘俊身邊9年嘅金秘書，由於朴敘俊無論生活上以及工作上都靠朴敏英安排一切，令到朴敏英冇晒私人空間，突然有一日朴敏英向朴敘俊表示要辭職，令朴敘俊日思夜想點解金秘書要辭職，更想起有次叫朴敏英送花畀異性，但朴敏英就表現好傷心仲眼濕濕，朴敘俊以為朴敏英因為鍾意自己，所以先決定辭職，但事實上朴敏英只係因為對花粉過敏而打噴嚏。

由於朴敘俊一心以為朴敏英鍾意自己，即走到佢屋企問朴敏英：「你話你因為想結婚同談戀愛先辭職？點解你會有咁樣決定？」又質問朴敏英係唔係識到個比自己好嘅男仔，朴敏英冇好氣咁話根本冇呢個人，仲話佢日夜都要招呼朴敘俊，邊有時間拍拖，如果連結婚都冇機會，佢就會孤獨終老。朴敘俊得知朴敏英因為想結婚而辭職，即揚言要照顧朴敏英一世，仲話叫朴敏英繼續為佢工作，但結婚就同佢結咁話，令朴敏英都唔知畀乜反應佢好。

《金秘書》順利開播，首集收視有5.757%，成績相當唔錯。

另外，朴敘俊、朴敏英早前拎住粉紅色棉花糖拍攝的海報，被指抄襲美國時尚雜誌《Glamour》於2008年2月發行嘅相，劇組相關人士今日就涉抄襲一事道歉，並回應指該款海報係參考其他小冊子而製作嘅宣傳海報，又承諾今後會多加注意。

更多韓流，喺晒《娛果》
http://fb.com/appledailyent