乜中環同西環入面，有人好似齊昕咁病咗咩？否則點解周圍打鑼搵怪醫？如果大家知道呢個「怪醫」只係醫學界立法會代表梁家騮，咁就明白點解佢咁受中西環關注。

話說一直被歸類為建制派，早前語出驚人話喺業界進行民調，逾半人反對政改「袋住先」，表明跟隨業界意向投票後，佢自爆中西方面人士、暗示「中西環」都搵過佢傾，但至今未能說服到佢，因為人大八．三一決定下提出嘅制度係有缺憾。

其實心水清嘅讀者亦不難發現，怪醫過去一段日子都唔多同建制共同進退，好似去年11月建制派分別聯署撐警同譴責示威者暴力衝擊立法會，佢都冇簽，當時建制議員解釋話未聯絡到佢。八方忍唔住問佢係咪真係咁難搵？佢解釋通常打去人哋辦公室、覆電話時對方咁啱冇聽囉，有時確係因為有啲字眼唔認同嘅。