周六英超早場上演大戰，由曼城主場對利物浦；利物浦領隊高路普周五就出席記者會，表明菲臘比古天奴唔會列入聯賽大軍名單，即是代表佢今季仍然未為紅軍上陣。

高路普深知英國記者關心古天奴狀況，多於周六嘅大戰，記者會笑笑口咁講：「我只會講關於比賽嘅嘢，如果記者想問其他嘢，請佢離開。」不過高路普仍然有談及古天奴情況，話古天奴周三先返到利物浦，心情唔錯，練習都冇咩問題，但外圍賽前都冇跟大軍練習，如果勉強上陣，基本上可以踢15至20分鐘，但高路普都係決定收起佢，古天奴亦滿意呢個安排。古天奴有份參與2場巴西外圍賽，並對厄瓜多爾一戰射入1球。

另外，由阿仙奴來投嘅阿歷士張伯倫，會列入訪曼城名單，高路普亦預期會派佢上陣。