求驗客手記:賓帥搵女神醫救病壞 - 求驗客
今日係聖誕節,利物浦領隊賓尼迪斯已為旗下班病壞球員準備一份大禮,就係計劃搵「胎盤醫生」嚟做軍醫。香港政府為咗對抗豬流感,鼓勵市民去打豬流感疫苗;唔知賓尼迪斯會唔會有樣學樣,要班紅軍球員啪定啲胎盤疫苗,等佢哋冇咁容易受傷。
利物浦班球員鬼咁易受傷,而且傷親都大大鑊。尼亞拿同班拿約早排喺無計可施之下,飛去塞爾維亞搵專門用胎盤嚟幫球員療傷、醫過林柏特同尹佩斯等將名將嘅高華絲域,結果話咁快就康復。聽講呢位留長髮分中間界、化行妝、打扮新潮嘅塞爾維亞女神醫,仲醫好咗格連莊臣、奧利里奧同埋紅軍「新晉藥煲」阿古蘭尼,似乎真係有咁上下實力。
賓尼迪斯見「胎盤醫生」咁掂,諗住邀請佢嚟晏菲路球場做軍醫。咁又係,紅軍今季喺英超大落後同歐聯不入16強,兵源不足係原因之一,但致命傷始終係太多傷兵,就連兩大主力謝拉特同費蘭度托利斯(F托)都唔例外,成日受傷。若然搵到呢個神醫,對紅軍肯定好有幫助,可以用胎盤療傷之餘,仲可以研究啲胎盤疫苗出嚟,等球員打咗之後冇咁容易受傷。日前賓尼迪斯堅持F托唔使做疝氣手術,唔通佢諗住將F托個case交畀「胎盤醫生」?
我求大俠收到風,英超、德甲、法甲同荷甲啲球員會定時定候去搵「胎盤醫生」,啲生意多到做唔晒;加上曼城都有興趣搵佢幫手,聽聞仲開到成20萬鎊(約260萬港元)年薪兼俾佢老兼醫其他球隊球員,所以賓尼迪斯想搶佢番嚟送畀球員做聖誕禮物,睇嚟要加多錢誠意至得。
話時話,謝老四日前話自己喺今季踢得好差,入波少又幫唔到球隊贏波,令到賓尼迪斯好失望。家陣連隊長都講埋啲咁洩氣嘅說話,睇嚟賓帥仲要搵個心理醫生番嚟,幫班球員攞番啲自信心至得。