【未到聖誕】曼聯推出新年版「龍」波衫 網民話似壽衣
蘋果日報 2019/12/17 19:10
曼聯農曆新年
聖誕都未到，曼聯已經諗緊點樣面向東方，推出咗慶祝農曆新年特別版嘅衣物，等中港球迷可以買定新衫過年。呢個新年系列以龍為主題，球衣以紅色為主，配上中國色彩嘅巨龍，衞衣同外套就有一個龍嘅圖案，靚唔靚就見仁見智，但就有網民睇完拉舒福特着住件衞衣做model嘅相後，話似壽衣。
另外，紅魔嘅勞基梳爾最近都化身「聖誕老人」，使咗成1.25萬鎊（約12萬港元）為50個球會職員每人一個豪華禮物籃，感謝他們默默付出。原來勞基梳爾對員工一向都好好，上年已經送咗30個禮物籃給球會員工，今年雖然職員多，但都照「加碼」，曼聯的員工真有福。