年薪合共6,000萬元嘅十幾個副局長、政治助理，上任差唔多兩年，實際上做過乜嘢呢？八方肯定一般市民講唔出，反而記得好多個都有外國國籍，上任後受批評先放棄，最多人有印象嘅可能係有個鍾意show卡片嘅蘇錦樑副局長，呢班政治權貴雖然薪高糧準，不過民望卻長期捧蛋，港大民意研究計劃指由於佢哋知名度太低，所以停止做民調，將資源撥到其他更有意義嘅調查。

港大停副局政助民調

港大民意研究計劃08年7月起每三個月調查一次副局、政助認知度測試民望，每次用電話訪問約1,000人，至今做咗7次調查，9個新、舊副局長之中，仲有兩個認知度係零，分別係政制及內地事務局副局長黃靜文同民政事務局副局長許曉暉，因為豬流感頻頻曝光、民望排首位嘅食衞局副局長梁卓偉都只係有1.6%認知率。
政治助理認知度方面，曾做記者嘅勞福局政治助理莫宜端最新認知率有0.5%，呢個已經係9個政助之中最高數字，認真嚇鬼，不過低處未見低，有6個政助認知度係零！成班高官認知度真係低到冇朋友，港大民意研究計劃總監鍾庭耀噚日話，由於過去18個月嘅調查都顯示巿民差不多完全不認識所有副局長同政治助理，情況持續兼呈退步現象，決定即時停止有關調查。

煲呔已轉軚在意民望

民調本來可以用嚟做監察官員表現嘅一個參考資料，既然市民將副局、政助當做透明，再做落去亦冇意思，不過經濟及商務局副局長蘇錦樑死撐，話自己關注工作多啲，少理民調數字；民望長期低於50分及格水平嘅政制局局長林瑞麟就話，主要官員或副手都係為市民服務，最重要係團隊精神，並非追求個人知名度，相信副局長同政治助理會繼續努力服務市民。
曾揚言視民望如浮雲嘅煲呔，一個月前改口話一定會重視呢樣嘢，因為好有參考價值，成班高官家陣仲話唔在意民望，唔通唔知道煲呔已經轉軚？
mailto:[email protected]