阿里巴巴姊妹公司螞蟻金服做大股東嘅浙江網商銀行（MYbank）噚日正式開業，阿里主席馬雲喺杭州主持開幕儀式。馬雲以往每次出席公開活動都妙語如珠，但噚日只係簡單致辭10分鐘，好在有佢一班好友撐場，巨人集團董事長史玉柱仲幫佢踩吓對手㖭。
23年前已經諗住搞銀行嘅馬雲終於夢想成真，但佢表現得異常平靜，噚日選擇喺杭州一間酒店舉行開幕禮，過程非常簡單，嘉賓、記者入場齊睇片，再聽主人家演講，近兩粒鐘就完場。
馬雲亦着得非常樸素，簡單白恤衫襯黑西褲，跟佢以往出席重要場合又中山裝、又IT Look，好大分別。

史玉柱暗踩騰訊「沒戲」

佢喺台上話，1992年開始已經諗住搞銀行，因為佢當初創業，為咗借3萬蚊人仔，用咗3個月時間都借唔到，認為如果有一間銀行專門幫小企業，可以幫好多人成功。
佢認為，其實中國與世界都不缺銀行，只「缺一個創新為小微消費者真正服務的銀行」。跟手佢就被「情與義，值千金」嘅安信兄弟上身，希望MYbank做一間有情有義、有擔當同有特色嘅銀行。
馬雲新銀行開張，佢班老友當然齊到賀。除咗同樣有份投資嘅復星集團董事長郭廣昌，銀泰集團董事長沈國軍、螞蟻金服首席執行官彭蕾、萬向總裁魯偉鼎與巨人集團董事長史玉柱都有出席。
史玉柱十分落力撐MYbank，話就算其他互聯網公司做金融「大部份也沒戲」，「他們的客戶，要麼是聊天的客戶，要麼是玩遊戲的客戶，不是支付客戶」。講緊邊個？似係對手微眾銀行嘅股東騰訊（700）囉。
話時話，史玉柱咁撐馬雲，不如拍番個「MYbank兄弟」廣告，一定紅爆網絡，客戶滾滾來！

李華華
mailto:[email protected]