同一個晚上，巴塞隆拿、利物浦各自喺本土聯賽有唔同戰果，紅軍輸波歐聯席位幾近無望，那邊廂巴塞「MSN」勁到入波破百，蘇亞雷斯又省兩粒。離開利記後，蘇神今季海闊天空，同多個冠軍接近；講到尾，利迷睇住蘇神「升呢」，又點會唔葡萄呢？

世盃「咬人」導致季初停賽，蘇神喺巴塞起步慢熱，進入下半季先上力，到呢一刻替巴塞轟入21球，聯賽13球、西盃2球，仲歐聯6球，巴塞三個盃賽都有機會問鼎冠軍，話蘇神唔係爭標關鍵，點都講唔通。

巴塞用7,500萬鎊轉會費引入阿蘇，呢一刻應該已值回七、八成票價，若然成為「三冠王」，「MSN」更加名留青史。至於利記放走阿蘇，係賺係蝕，嚟到季尾利迷應該心中有數。羅渣士噚晚賽後講到，利記最欠缺嘅係一位前鋒殺手；呢句真係自打嘴巴，賣咗阿蘇，換嚟巴神、列基林拔等攻擊球員，夾埋都唔夠阿蘇一個勁，盤數計錯晒，換幾多個番嚟都冇用，依家竟然講呢啲！睇嚟，阿蘇每入一球，就好似用大槌咁揼落羅渣士同利迷心口，痛在心中！