仲講阿仙奴作客贏車路士？有啲out囉，不過都係要講，咁耐冇威過，講多陣都得啩？
先扯開吓話題。話說有日買咗件曼城波衫，着返工啲同事就話我轉咗會，其實係因為買平貨；而成日講AC，就係因為紅黑軍真係我第二最愛；所以話呢，上個禮拜六喺公司睇完波做完版，我可能仲high過話買咗阿仙奴客W嘅仙道彬兄。
呢場波，個個人大讚尹佩斯入3粒叻仔，我就對同我同姓嘅謝雲奴特別留意，呢位仁兄有門前3碼打飛機，又有單刀橫傳，到底佢想點呢？
公司啲兵工廠躉，個個都笑謝雲奴；第一吓佢唔入，係抵鬧，不過點解之後有機會，都要橫傳畀尹佩斯呢？小弟同向來對英意足球素有研究嘅「視而不見大大」傾過，佢話之前阿仙奴謝晒皮嗰陣，見阿大佬尹佩斯成日喺場上鬧鬼謝雲奴，指指點點之類，加上非洲佬把握力不嬲都係有限公司，越鬧就越淆底，唔出奇吖，咁咪搞到佢冇晒信心囉，同有波唔敢射囉，點打前鋒呀！