「長江生命科技」上市，證券界普遍預料有一百倍超額認購，每股股價不高於兩蚊，共發售十三億零七百萬股（其中一億三千零七十萬供公眾認購，其餘配售），約集資二十六億一千四百萬元，包銷佣金係二點五巴仙，所羅門美邦係保薦人，今勻肥仔水矣。
梁伯韜過檔之後，卒之做番齣好戲，可見有貴人扶持，生命零舍快活。全部上市費用估計合共一億三千萬元，你話成日有大型上市集資嘅話，中環啲專業人士會幾開心呢！
呢日見到股評專家A小姐，揸住叠申請「長江生命」股票嘅黃表，問左丁山要唔要，佢話賺梗喎。

問佢點解淨係派黃表，A小姐話：「上一代投資者喜歡用白表申請，新一代投資者以短線投資為主，一定用黃表。假如你在證券公司或中央結算所有戶口，可用黃表申請，股市掛牌之日，你就有股票在戶口，可以立即獲利回吐。假如用白表，股票會寄到你手上，需時成個禮拜，收到嗰陣，股價可能已經唔同晒，所以短炒一定用黃表，新派投資者冇咁好耐性長揸股票嘅。」
A小姐好有市場觀察力，但佢話交易所唔識轉膊沿用古舊思維，要求多印白表，少印黃表，搞到市面白表供應太多，黃表唔夠派，經紀行踢晒腳。
畢竟前線經紀最懂得投資者口味，交易所要吼緊啲至得。