踏入第15年的7.1民陣大遊行將於本周六起行，今年民陣召集人由民主黨、南區區議會「票王」區諾軒「揸旗」，同港足教練金判坤勁似樣嘅區諾軒，自細已是多才多藝，年少時懂得吹笛、打鼓娛賓，大學時唔跟潮流去美、加、澳交流，自己走咗去日本，練得一口流利日本，家吓勁到開班授徒教日文。近年佢更加成為「領展狙擊手」，踩場抗議為小商戶出聲。

區諾軒年少時已搞群眾運動，就讀聖若瑟英文中學時，參選競逐學生會，做副會長，拉起橫幅叫同學寫上對學生對學校意見，一呼百應，個個同學走埋嚟寫意見，區諾軒將下情上達。不畏強權嘅佢，不滿當年中學校長成日搞埋啲面子工程，走去校長室門外大喊「校長收皮」。反叛學生成績一定差？區諾軒話你知唔一定，當年佢高考中化攞A，入埋中大政治及行政學系威畀你睇。

上到大學，區諾軒碰上中大史上最不受歡迎校長之一嘅劉遵義，為咗表示對劉遵義嘅不滿，除咗將中大畢業禮變成示威場地，區諾軒仲同埋其他同學成立「劉遵義施政監察」，極之不滿劉遵義搞嘅校園發展計劃，呢個監察組織亦可謂係中大創校以來，首個瞄準校長嘅學生組織。在學時，區諾軒擔任中大學生會嘅內務秘書，專責監察校政，沈祖堯準備接棒上場時，佢帶咗個「劉遵義離任倒數鐘」，要求沈祖堯揭幕。當年中大校巴計劃要收費，區諾軒喺學生會印製假嘅三元車資車票，畀同學塞滿校巴錢箱，以示抗議。

細細個就立志做議員為民請命？區諾軒話，其實佢細個「我的志願」，係寫電台節目主持人，佢仲會厚著面皮上電台玩遊戲。上到中大，區諾軒主持中大校園電台，做外務副台長。

自細就抗爭史一大籮，唔少父母未必鐘意。區諾軒話，大學時，父母知道佢喺大學校內衝擊，見晒報唔多鐘意，「佢哋已叫我，好心唔好咁激啦！」不過，為公義、爭民主、為小市民發聲，從來都係一點一滴，用時間做證，區諾軒2011年當選做議員，2015年做埋南區區議會嘅「票王」，父母老懷安慰，選舉時仲替佢助選添。