秀智有韓國「國民初戀」之稱，女神靚就梗㗎啦，不過噚日播出嘅SBS節目《深夜TV演藝》就認真大整蠱，居然公開咗秀智2011年拍攝韓劇《星夢高飛》時，因為天氣太凍流鼻涕，搞到NG嘅瘀爆片段。

片段中，秀智本來好開心咁拎出一排乳酸菌飲品飲，不過天氣實在太凍，雖然佢已經帶晒冷帽又頸巾保暖，但身體最誠實，成行鼻涕好似水柱咁流落嚟。當時秀智仲係新人唔識畀反應，連拎紙巾出來抹都唔敢，只係儍儍地望向工作人員求救，最後當然NG收場啦。網民睇咗呢段片都大讚秀智好可愛，話絕對唔係佢嘅屈辱喎。

另外，秀智為宣傳即將上映嘅新片《桃李花歌》而接受訪問，佢大讚老闆朴震榮係非常好嘅老師，不但教唱歌跳舞，連思想同健康都照顧埋，「佢的確係好獨特嘅人，舞台上嘅樣、練習時嘅樣，真係好厲害。」