中午食完飯盒，沿住政府大樓西翼旁嘅斜路步行上終審法院大樓，之後入聖約翰大教堂或者經過長江公園去萬國寶通大廈到香港公園，確係一樂也，可以幫助消化，兼可享受一片青葱翠綠。
假如政府總部搬去添馬艦，下亞厘畢道一帶，用嚟做乜好？假如政府大把錢，唔旨在，左丁山認為最好用之為公園，種滿樹木，等中環人可以有塊呼吸空氣嘅地方，呢帶勝在大樹多，相對寧靜，係繁忙鬧市中之一塊綠洲。

係大想頭一啲，相信政府多數會將土地拍賣，作寫字樓用途。左丁山問過估值專家Y：「你估投資基金、大投資銀行鍾意去添馬艦辦公吖，還是鍾意在下亞厘畢道？」估值Y話：「諗都唔使諗，一定係下亞厘畢道，添馬艦唔係中環核心地帶，交通不大方便，做公園只會益晒星期日出動嘅人士，即係菲傭，做政府總部反而啱啱好。騰出下亞厘畢道，將現時幾幢政府大樓拆建，保留樹木，加種洋紫荊、杜鵑，建成嘅商業大廈一定會成為頂級寫字樓，有權叫租每呎一百蚊。嗱，嗰度與長江中心、滙豐銀行、渣打銀行銜接，可通往萬國寶通中心，落去皇后大道中置地廣場十分容易，位置一流，況且啲投資銀行高層多數住響半山區，好多僱員可自干德道、羅便臣道行路落嚟返工，一般職員更喜歡嚟呢度返工，勝過去添馬艦。真係愈諗愈正，最好請政府快啲搬走！」
照佢講呢塊地皮嘅呎價會比添馬艦更值錢，曾特首個算盤打得好響，叻過田北俊、民建聯、民主黨等多多聲（希望政黨唔好以為左丁山係曾先生嘅秘密武器，陶傑先至有資格，不過佢強烈否認。）建設香港，唔係一定要互相針鋒相對嘅，大家坐低傾詳細啲，有乜唔好？反對在添馬艦興建政府總部之人，係為反對而反對，為錯誤嘅利益而反對，左丁山不敢苟同。