劉鴻雄太太甘比(Kimbee)今年誕下第三胎後，湊三個仔女之餘，亦不忘行善。近年主力為大劉管理「劉鑾雄慈善基金」慈善基金的她，第一個行善試點就是以大劉媽咪命名的葉淑婉紀念自修中心。

她早前去了自修中心和貧困家庭的小朋友見面兼派糖，小朋友見到糖果非常雀躍，亦不停和甘比及義工等傾計，分享學校及家庭趣事，甘比和小朋友打成一片，全程開心笑住一齊玩。她透露今次派糖活動，是和美國糖果品牌Sugarfina合作，「今次與品牌一齊搞的活動，很有意義。因為對低收入家庭的小朋友來講，糖果可能都係奢侈品，加上佢地家長好多都忙做嘢，未必顧及到，所以能夠有機會為呢班群小朋友製造一次開心回憶，我地也覺得高興，希望這類活動陸續有黎。」甘比管理的自修中心，致力令貧困人士自力更生，改善生活，現時有會員超過1,000 位，中心會定期安排活動給小朋友參加，如主題公園遊玩、看電影、參加社區活動等。

至於合作的糖果品牌Sugarfina來自美國，2012年在比華利山開第一間專門店，曾被評為「世界上最美麗的糖果店」，最出名是以Dom Pérignon陳年香檳製作的Champagne Bears香檳小熊軟糖，有不少荷里活明星捧場客，即將來港開店進駐海港城，楊千嬅、何超蓮等都率先收到糖果，而阿嬌早前結婚派糖的巨型禮盒庄，就要上千元。

精選娛聞，喺晒《娛果》
http://fb.com/appledailyent