大陸女星范冰冰捲入「逃稅風暴」，至今已經「神隱」超過三個月，各種傳聞湧現，有講過佢被軟禁喺酒店，亦有傳佢秘密去咗美國，但范冰冰一直未見公開現身，只係試過喺今個月16日生日當天，喺微博上線，刪除咗一條系統自動發佈嘅「生日快樂」post。

今日美國傳媒《CNN》刊登一篇署名文章，標題為：Fan Bingbing's disappearance shows no one is safe from Beijing，撰文嘅Michael Caster於twitter稱自己係維權人士、研究員，過往亦曾多次發表中國人權問題嘅文章。

文中提到，如果連范冰冰呢個級數嘅「國際知名藝人」都可以喺中國突然被消失，文中直指「no one is safe from Beijing」，喺中國根本就冇任何人身安全，報道仲提到有唔少維權人士及記者都被失蹤過，而自范冰冰消失以嚟，中國官方從未向外宣佈過任務消息，根據中國的「指定居所監視居住」（RSDL）政策，警方可秘密拘留一個人超過六個月，文中質疑喺中國被失蹤嘅事已經越嚟越嚴重，提醒於中國境內嘅任何人都有可能成為受害者。

《CNN》曾經喺17年向中國外交部提問有關中國司法及人權嘅問題，當時中國外交部嘅回應表示「中國是一個法治國家」（A Country with a rule of law），仲話「中國司法保證了犯人所有法律權益」，更強烈呼籲外國媒體要尊重中國司法權、鄭重事實咁去報道。

精選娛聞，喺晒《娛果》
http://fb.com/appledailyent