當年今日
關於我們

中環在線:上實蔡來興退休破慣例 - 李華華

蘋果日報 2008/04/22 00:00


國內國有企業領導,一般嘅退休年齡為60歲,而任期通常每5至7年就嚟一次換班。不過,上海實業集團,同旗下上市公司上海實業控股(363)嘅董事長蔡來興就有特殊待遇。蔡總一做就做咗13年,今年6月已屆66歲,兩個慣例都俾佢打破,而今年佢終於可以退落嚟。
噚日上實記者會上,蔡來興宣佈退休嘅消息,佢話已經辭任咗母公司董事長嘅職務,至於上市公司董事長個位就辦理緊辭退手續。佢話退休後會弄孫為樂,做自己喜歡嘅事,佢仲有個大志,就係出書,連書名都諗埋,叫《商海風雲》,道盡商界逸事。
長江後浪推前浪,蔡來興嘅繼任人滕一龍雖然話係「後浪」,但都60歲,畢業於上海交大,讀工業管理工程專業及華東政法學院民商專業。滕總來頭都唔小,據蔡來興介紹,滕總曾任上海江南造船廠主要領導,亦都係全國政協委員。蔡來興話等手續辦妥,就會同滕總出嚟見大家。