大前日台灣高雄上演了一場特警連開22槍擊斃持槍匪徒嘅案件，不過新聞嘅重點，反而落係另一位疑犯帶同嘅鸚鵡身上。網友關注呢位槍擊案嘅「目擊證人」，多過原本單槍擊案，有網友過呢隻鸚鵡真大命，居然毫髮無損。

仲神奇嘅係早喺上星期舉行嘅電影博覽入面，古天樂同宣萱宣佈會拍馮志強導演嘅新戲《犯罪現場》，故仔嘅惟一目擊證人同樣係一隻鸚鵡。今日馮志強導演接受電話訪問，講到呢單巧合，佢話：「噚日好多人send呢單新聞(台灣槍擊案)畀我，覺得好神奇。當然證明幾多匪徒鍾意養鸚鵡，2010年開始諗故仔，覺得有新意，等如《大樂師。為愛配樂》咁冇咩人拍過，比較新鮮，我都會寫。」

故仔講述賊人徐糠伏屍屋內，探員張繼聰負責調查，屋內目擊證人，只有一隻鸚鵡，佢只會不停講「傻瓜、傻瓜」。戲中張繼聰演一名古怪神採，同鸚鵡有最多對手戲，佢仲要負責「盤問」隻鸚鵡。而演大賊嘅古仔同宣萱有一段極反傳統、卻又相當淒美的感情線，會再續電視劇《寵物情緣》嘅感情戲份。