噚晚一個牛仔褲品牌喺華星冰室搞Party，鄭希怡(Yumiko)、蔚雨芯(Rainky)、狄易達同許靖韻等人出席，眾人都一身「牛氣」現身。

Yumiko同許靖韻同樣梳辮現身，十足十兩姊妹，被稱為孖妹，兩個一齊受訪時，Yumiko話:「其實都唔少人話我哋似，可能今日咁樣裝扮，係新一代Puffy。」問許靖韻似師姐有冇壓力?佢話:「唔會，似親都係靚女都開心，之前都被認錯，有次做完嘢拖喼行過大排檔，有人叫我泳兒，不過我覺得自己兩個都唔似。」

Yumiko就話:「我自己都試過比人認錯，前兩日去街市買嘢，有人話:『我認得你係官恩娜!』我同佢講我唔係呀，佢就話『你一定係!等我送多兩包比你啦!』但係似靚女都開心。」講到好友黃伊汶(Emme)下個月喺峇里結婚，佢係姊妹之一，問婚禮搞成點?Yumiko話:「Emme好獨立，好多嘢自己搞掂，但係做姊妹就有個theme(主題)，一路照住個theme去做，大家都諗緊比咩驚喜，佢話之前知道我(當時)就快結婚，花球都唔會拋比我，費事嘥咗。好開心喜事一件接一件。」佢又話成個婚禮會搞幾日左右，問佢諗好點整蠱新郎哥未?佢話:「今次應該再毒啲，因為發覺班男嘅可以再盡啲，班兄弟係自己人，我老公同小春都有份。」

同場嘅Rainky最近出新碟，佢話10月頭拍MV，想繼南極著bikini之後，再搵高難度嘢去玩，不過仲諗緊。講到之前選「美人魚」落選，咁仲有冇下文?佢話:「比賽完後暫時冇任何通知，不過都有機會合作，我自己好期待，星爺係我偶像，客串一秒都開心。」問佢係咪唔收錢都做?佢就話:「尊重公司決定，我自己就好想做。」