楊采妮（Charlie）同劉德華喺新戲《再說一次我愛你》度要做一場垂死告別戲，原來Charlie演出嗰陣要黐喉管瞓病床，通宵拍六小時戲，重要狂喊同只可以食流質食物，認真慘情。
劉德華同Charlie主演嘅新片將於本月中上映，戲中華仔一人分飾兩角，做Charlie同阿Sa（蔡卓妍）嘅老公，佢兩位老婆都受病魔折磨，阿Sa死後重將心臟捐畀有心臟病嘅Charlie。Charlie要插喉瞓醫院，導演搵嚟專業醫生為Charlie黐管，佢瞓喺病床度向華仔哭訴，結果由頭喊到尾，拍足六個鐘，十分辛苦。
Charlie噚日喺電話中話：「我第一次演垂死病人，好緊張，又要狂喊，到放食消夜我都唔敢郁，怕郁親啲位要人整番就唔好意思。」Charlie話拍完嗰場戲後感受到病人嘅苦楚，所以會更珍惜健康。

華仔亦話：「我睇見Charlie都覺得可憐，啲醫生黐完就走，但我哋唔敢幫佢除，怕又唔識黐番，我哋食消夜，佢只可以飲流質嘢，又喊到冇胃口，好似真病一樣。本來我問佢話夠唔夠膽除咗之後等我幫佢插返條喉，我怕插花佢塊面，佢梗話唔敢喇！」
華仔又透露嗰場插喉戲係佢睇咗西片《擊情》之後攞到嘅靈感喎。