黃心穎同圈中「毒毒」馬國明發展得唔錯，不時拍拖食飯互相了解，馬明同心穎BB上月底去咗橫店拍《深宮計》，同劇仲有馬明舊情人胡定欣，心穎BB當然落力啲睇住男友，馬明仲要同胡定欣喺劇中有感情線，據知胡定欣喺片場同心穎BB冇咩交流，而馬明同心穎BB嘅感情戲喺尾聲，所以馬明主力拍同定欣及周秀娜嘅戲份。

今日有周刊指，心穎BB為咗多啲時間見馬明，知道只有主角同外援先可以自己一間酒店房，其他藝人要兩個人一間房，心穎BB冇助手喺身邊都要求一個人自己霸一間雙人房，據知喺出發前，心穎BB已經同工作人員講因為想有私人空間，自己俾咗全數房錢，仲要同馬明住埋同一層，而馬明開工，只要有時間心穎BB都會去現場陪伴，當人哋拎佢同馬明嘅緋聞嚟講，心穎BB都完全唔介意。