時間啱啱好,昨日叫大家做好兩手準備,揀定啲指數輪,等恒指突破橫行區就定番個止蝕位飛身入去買,昨日港股借外圍造好挾上,開市就裂口一躍而上,好輕鬆就升越20日線,企喺19110收市,升191點,點解唔抽高啲?淡友都頂得好實,不過唔係還擊嗰隻,睇嚟係且戰且走,632.2億元成交絕對唔係講玩,好友掌握局勢,梗係唔使急,下個禮拜挾多一兩日,好多淡友都要投降。
大家都應該有聽過「借力打力」,個市喺低位橫行,只要跌多少少,或者吹一個利淡消息,情緒就會變得悲觀,乜嘢聖誕鐘、乜嘢新年例旺都唔會令人動心,不過,個市挾600幾億元成交重越19100,就唔係咁話嘞,投資者習慣咗聖誕節同聖誕老人攞禮物,下個禮拜個市再升,大家會睇到好多散戶盤跟入,力量就會變得好大,好友要推個市上去就容易好多,咁嘅環境,人人都識得惜售股份,需求大、供應少,你話個市會點?