【新增影片】
利物浦禮拜三晚失驚無神公佈1月1號就會正式喺修咸頓簽入後衛華基爾雲迪積克（VVD），呢位荷蘭國腳高達7,500萬鎊（約7.85億港元）嘅身價自然係各界嘅焦點。

VVD就咁樣搖身變成全世界最貴嘅後衛，前曼聯右閘加利尼維利就喺Twitter tag咗加歷查，問佢覺得呢單交易抵唔抵。係人都知加利佬同加歷查踢波果陣勢成水火，兩個人退休之後一齊講波都經常擦出火花，估唔到加利佬問完無耐，隔咗唔夠20分鐘就收到加歷查嘅回覆，仲俾呢位前利物浦後衛搵到個靚位入咗紅魔鬼一嘢，順便抽水。

到底加歷查點樣答加利佬嘅問題？

「我都唔肯定，不過只係貴過域陀連迪路夫一倍嚟講，我覺得直頭係買得平喇！」域陀連迪路夫係邊個？咪係摩連奴今個夏天買返嚟，但擺多過踢、只係喺英超上陣八場嘅水貨瑞典後衛囉！

--------------------
BFB CHAMPIONS 2.0 聖誕新年活動連環出擊，登入即送傳奇球星「林伯特」！ http://bit.ly/2xrTKGM