陳志雲、陳法蓉、王喜、楊婉儀、林德信等今日喺Sky100為天開電視有限公司舉行「1‧23重新定義電視」新聞發佈會，鄧梓峰擔任司儀，不過當陳志雲上台時，佢就話：「我要解構點解TVB會俾你嚟，你唔好睇得TVB咁小器，TVB係大台嚟㗎嘛，大台梗係包容啦！」

陳志雲喺呢個平台主持節目《大開眼界》，佢表示會講吓香港電視業嘅發展，之後會有個變奏，就係遲啲會帶團去芬蘭睇北極光，佢話：「推介旅遊、紀錄片、另一個變奏就係會搵朋友上嚟傾偈，節目內容好豐富，10分鐘一集，方便大家睇，所以係『為觀眾搵節目，為節目搵觀眾』。」會唔會為觀眾解構下咩叫「山頭文化」？陳志雲話：「好主意，一於下集講。」有高層鬥爭？佢話：「又唔可以咁講，但一定有山頭，好自然嘅，製作團隊裏面大家共事過，大家有咗默契都會用番，健康嘅就係唔會以後唔用你，唔健康都會嘅，去第二度會有其他衝擊。」覺得汪明荃（阿姐）好敢言？佢笑住話：「一向都敢言，阿姐有咩好怕。」講咗好多人嘅心聲？佢表示：「我諗都係，就等我搵阿姐上嚟講。」

至於陳法蓉透露去年10月同好友朱茵喺大陸開咗兩間護膚品店，心願係喺香港開。賺錢未？佢話：「未有錢分，但樂觀嘅。」怕唔怕因財失義？陳法蓉話：「今次係我、朱茵同經理人一齊開，朱茵搭住我膊頭話『乜都會以友情行先』。」

最港電影大獎投票網址
http://bit.ly/thekongestfilmawards

精選娛聞，喺晒《娛果》
http://fb.com/appledailyent