難得噚日見到林雪,馮仁昭第一時間搵佢了解吓,喺活動度表現神態自若嘅林雪,喺訪問嗰陣講起欠債一事,佢就連環爆粗咁話:「X!X噏!唔好X理佢啦呢啲嘢,講起就㷫!每年寫一次,寫咗三年。」係咪俾人整蠱?佢就話︰「整紅咗我㖭,唔好幫我啦,做乜幫我啫,我由頭到尾都靠自己㗎。」林雪又透露自己近年一直喺內地拍戲,而且有唔少工作。
講到影壇惡人之一嘅何家駒日前病逝,林雪就話前排先同佢合作完《壹獄壹世界》:「心痛,少咗個惡人,人生如戲,簡簡單單就算,成日問片酬,開心咪得囉。」
至於小鬼就話雖然片中有唔少新演員,但全部都演得好自然,佢又大賣口乖話香港係佢事業轉捩點,所以今次嚟拍戲都好開心。講到好友羅志祥同周杰倫雙方近日有啲罵戰,小鬼就話:「應該是誤會吧!他們應該沒甚麼的,兩位都是我好朋友,我都不該講些甚麼,讓話題stop好了。」
撰文:馮仁昭