方健儀同陳凱琳今日喺紅磡出席星夢郵輪記者會，方健儀話自己試過一次坐郵輪，但就唔係同老公洪楚恆一齊去，佢直言原本諗住好靜態，佢話﹕「原來咁多嘢玩，去每個點都唔使推住大件行李落船，好方便，自己又鍾意做spa。」

由於在船上上網要另外收費，方健儀話可以順便改變生活模式，完全放鬆一下，佢話﹕「對住部電腦好似放唔到假，冇網絡嘅世界都好正。」稍後方健儀就會同老公去日本睇紅葉，佢大讚老公係最佳旅遊伴侶，因為無論買嘢要等幾耐，老公都冇詐型。佢仲透露下月就係佢哋結婚七周年，問有冇七年之癢？佢笑言：「身痕就有，心癢就冇，我哋關係一路係亦師亦友，佢喺我顧問，見佢個樣已經好治癒，冇鬧交，過得好快。」