英皇集團主席楊受成、汪詩詩、汪圓圓同老公蔡加讚（Karson）等，今日喺金鐘出席琦琦嘅新錶發佈會，楊生被追問之前承諾鍾欣潼（阿嬌）送豪宅幾時兌現？佢話：「佢揀緊，任佢揀，冇所謂，不過有budget嘅。」問到budget係咪億億聲？楊生笑言距離仲有好遠，問到傳聞層樓700多萬，楊生就唔肯講。

不過講到阿嬌9月喺香港擺酒，楊生就肯定話：「係呀，今次要去，要去埋數。」至於會唔會催阿嬌生B？楊生話：「順其自然，佢鍾意就得，莫講話同事，自己仔女都催唔嚟，o依家見到一對孫好開心，孫仔孫女都好靚。」

再問到有冇關心容祖兒（Joey）？楊生話：「佢好好。」會唔會催Joey快啲嫁？楊生就嘆晒氣，問佢係咪好擔心？楊生就話：「唔係，唔擔心，唔需要慰問，唔知佢兩個點，Joey狀態好好。」

另外，詩詩同圓圓父親節會到英國出席表妹婚禮，圓圓爆囡囡Celine會做花女，仲話佢好貪靚，日日都要着裙，而詩詩囡囡會喺婚禮上表演唱歌，Karson笑言每年父親節都有驚喜，不過唔需要禮物，作為父親已經好開心。

精選娛聞，喺晒《娛果》
http://fb.com/appledailyent