一位曾踢過國際米蘭卻冇乜名氣嘅舊將，近日爆料現任曼聯領隊摩連奴，當年為咗遷就巴西右閘馬爾干，特登將集訓由朝早改到黃昏。

呢位叫伊恩斯薛古（Ianis Zicu）嘅羅馬尼亞球員，曾經喺國際米蘭效力過六年、但就從未喺一隊上陣過。不過，佢當然好清楚內部鮮為人知嘅事情，近日就向傳媒講返摩佬仲係國米教練時，因為知道馬爾干逢周日晚就會飲醉酒，所以決定調周一朝早嗰課操練，去到傍晚先進行。

當大家以為摩佬軍令如山，偏偏對住馬爾干，原來係咁忍讓：「有個球員逢周一都唔會酒醒，就係馬爾干。摩連奴就召集大家，問下有咩方法可以令到馬爾干參與集訓，結果佢之後就將操練課改到傍晚。所以有時就係唔可以咁死板，對某啲球隊，呢種改變係可行嘅。」

摩連奴證明佢嘅改變冇問題，因為2009/10球季，國米就喺馬爾干協助下，成為歐聯、意甲同意大利盃三冠王。