《2017香港小姐競選》今晚假將軍澳電視廣播城舉行，今年司儀都好創新，搵咗森美同麥美恩拍檔做司儀。節目一開始，就由去屆港姐冠軍馮盈盈聯同黎諾懿、楊明、何廣沛同丁子朗揭開序幕。之後十位候選佳麗穿上由Henry Lau設計，以「銀河魅影繁星花」系列晚裝登場，但就似乎畀評判宣萱搶晒鏡，因為宣萱着咗條超低胸紅色晚裝，非常性感。

一班佳麗作簡單自我介紹出場，講令自己最自豪嘅事，大部份都係同讀書有關，其中1號何依婷、4號黃瑋琦讀大學時都攞獎學金，真係幾叻女。

頭part就玩battle唱歌，兩大坏熱門:1號何依婷同10號張寶欣對決唱《喜歡你》，好老實，兩個都走音，唔算好聽。無綫亦善用佢哋個app，同步live玩俾心心，竟然係何依婷遠遠拋離，以十萬個心心勝出，森美讚佢以「肥媽式」嘅拉咪獲得最多心；2號李清心跳舞同5號雷莊兒唱《仙樂飄飄處處聞》，結果雷莊兒唔夠1分鐘已經有十萬心心。

學著名KOL盤菜瑩子小姐話齋：「史上最好睇港姐　鬥擺pose同試食真係好正」‧