股仔遇正洗倉潮，宏安（1222）對上星期五一插變仙班，現價起碼有5厘高息墊底，昅昅無妨。
宏安由街市管理業，發展到中、港地產業務，08年上半年度，住宅物業銷得，（9月底止）純利係咁意增長20%到5029萬銀，而中期每股派息亦加到0.16仙（07年同期0.15仙），純利及派息冇走到樣。
07年下半年以嚟，花旗國狂減息，香港地產火熱，集團計劃今年第一季推售，連私人泳池嘅沙田嶺別墅項目，應該食正升浪。若然趕得及08年度入賬，業績繼續省鏡，派息斷估亦唔手緊。就當宏安08年末期息維持每股派0.33仙，全年息率都講緊上5厘。
宏安由上年6月1蚊樓上，插到家陣得番9.6仙，跌足9成，技術超賣兼背馳。呢轉博反彈，淨係博宏安股價上番50日線0.124元，現價潛在回報率都講緊29%。

位元堂燒冷灶

位元堂（897）同上邊宏安，份屬同系，冷灶值得燒燒。位元堂08年上半年度虧轉盈1541萬銀。幾瓣主打中、西及保健品業務全部靚爆鏡。要咁睇，今年流感肆虐，位元堂由中醫藥、補品到西藥止咳露，應該好銷得，全年度業績應該keep住有睇頭。再講，位元堂投資嘅利來（221），呢期郁郁吓，位元堂又有同氣連枝概念。冷灶煲位元堂，短線博升20%到0.22元，位元堂未有耐到NAV（0.4元）水位。