自從一句撤回後，港股進入近兩周的蜜月期，恒指勁彈1,800點，這趟relief rally仲可以玩幾耐？可以從三方面作判斷。

先講避險指標。恒指上日衝穿27,300關，已幾乎回到8月初水平；至於美國債息一輪急升（反映資金沽債買股，屬於risk-on現象）後，亦重返8月初位置。金價現處1,490美元水平，較8月初仍高約40美元，這相信與環球央行放水潮有關，錢唔值錢，要買金傍身。美滙指數近日急回，已見8月初低位，資金有回流新興市場之勢。

貿談進展方面，10月初中美埋枱再傾之前，雙方互釋善意，美方把加稅死線由10月1日延至15日，並否認將香港問題與談判綑綁。其後阿爺亦宣佈，暫停對部份美國商品徵收關稅，並擬增購豬肉、大豆等農產品。形勢看似大好，但雙方反口覆舌早有前科，一日未簽停火協議仍可拉倒。觀乎美國消費數據仍強，而大陸核心CPI則見通縮風險，拚經濟根本差九條街，再死撐只是自欺欺人。

另外，與近月反彈市比較，港股今次股份升跌比例明顯較佳，加上資金肯沽強換弱，由昂貴的避險股轉炒經濟復蘇股，是一個利好訊號。總括而言，比較恒指與債息、金價、美滙的走勢，顯示港股追落後的行情已基本結束，加上A股國慶行情近尾聲，後市料轉反覆震盪，重貨者宜逐步減倉，獲利為上。

魏力
www.facebook.com/2012jason
---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情： https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書