國際消費者聯會第18屆全球會議正喺澳洲悉尼舉行，噚日選出新一屆理事會成員，消委會總幹事劉燕卿（Connie）當選理事，仲係票后，點解咁巴閉？可能同後面有強大勢力撐佢有關。
Connie人在悉尼，八方打長途電話搵佢，佢話國際消聯會有115個國家共220個會員組織，每國只可以派一個代表參選，內地同澳門消費者組織推舉Connie做代表。呢次選舉共有25個人爭13個位，結果Connie喺63票中攞到48票，係最高票當選理事。
Connie話可能其他會員好關心中國消費情況，所以投票畀佢。佢指中國係全球最龐大消費市場之一，希望日後可以透過國際消聯會，畀外國人知多啲內地情況，又可以畀同胞多啲國外消費資訊，做個精明消費者。