寶哥哥花都緋聞成為城中熱門話題，想唔到重可以帶挈有人發達。八方前日碰見《香港名門──李氏家族傳奇》嘅作者秦家驄，佢笑到見牙唔見眼咁話，出版社最近通知佢，本書會加印第二版。
講開呢本書認真巴閉，阿秦用咗前後十年響英法搜集資料，今年三月甫推出二千本中文版，就撞正李國寶緋聞，如果唔係呢本咁詳盡嘅李氏家族史，全港報章都無得大段引述。
不過，秦家驄就話自己平日好少睇中文報章，唔知自己本書被引用，但佢承認寶哥哥嘅緋聞唔多唔少對銷量有幫助，重講笑希望大家用錢買書，唔好影印或者去圖書館借。
至於再版數量幾多，出版社以商業秘密為由唔肯透露。不過八方聽聞嚟緊七月書展係旺季，印多兩千本都冇問題。


傳真︰2623-9278
電郵︰[email protected]