唔知咩事呢，近排有好多董事話唔撈，之前有數碼通（315）行政總裁黎大鈞，上星期有電視廣播（511）王雪紅，最新有劉鑾雄（大劉）女友呂麗君。
據噚日華人置業（127）嘅通告所講，呂麗君希望投放更多時間喺其他商業同慈善事務上，於是決定辭去華置執董職務，仲要係即日生效。
據華置資料，呂麗君2001年加入華置，一直冇加入董事局，直至2012年7月，佢先加入董事局，嗰陣好多人估計，因為大劉官司纏身，所以派女友入董事局睇住。
咁啱，之前有報道話呂麗君深得大劉母親劉葉淑婉歡心，呂麗君亦好孝順老人家，大劉母親本月16日因病辭世，𠵱家呂麗君就忽然話唔做，孖屐自然就會猜想兩者有冇關係。大劉另一女友甘比嘅家姐陳詩韻就仍然喺董事局。