對於長實君柏回報率不足2厘，資深經濟分析師林一鳴表示，其實好多而家買樓回報率不夠3厘，因為樓價升，租金追不上升幅。

他指出，目前市場兩邊走，「最平幾百萬，一推盤就賣得哂，租務同買賣都是最容易被市場承接；半億以上，好多都創新高。反而中間2,000至4,000萬元價位的物業，近幾年，升幅最低，租金回報率亦是最低，因為需求不及一頭一尾。呢啲樓盤的租客可能是打工皇帝，住得起君柏，人工都有十零廿萬，又未去到大老闆，賺過億，又唔係掹掹緊，但佢地收入高，支出都高，可能個仔讀國際學校，結果可承擔租金都有限，一般是人工3至4成。」

當日長實提供高成數按揭，甚至12年特長成交期，部份人被呢啲吸引咗而走去買，事實上市場上2000至4000萬元物業係最難成交，要擺好耐。

近期新盤買家蜂湧搶購，他認為，買家有兩批人，包括幾年前本身是業主，各方面原因賣左樓，租左幾年，今日發覺唔係咁著數，又驚今日再唔買，過多兩、三年，可能連公屋都買唔起，榨頸就命。另一種就是父母幫仔女去買樓，但啲後生仔買樓都是靠父母，佢人工未必夠可以承擔個樓價。好明顯市場是由呢兩班人去承接，而佢地負擔能力是掹掹緊，未必可以係二手市場入市，因為按揭收緊，要俾4成首期，咪就去買新樓囉!

他補充，目前是用家主導市場，投資回報並唔係最重視。而家個班人買樓主要唔係買樓收租，今日為咗收租去買樓嘅人其實唔多，以前買樓收租啲人唔去買㗎啦，回報率少，本身自己一定有物業，再買要俾15%稅，相當於幾年租金，計唔掂數，咁咪唔做其他嘢。主要觸發樓市變動，是當樓價太高，加息周期開始，供應量上升，樓市轉角機會大，純粹租金回報唔係最重要因素。

掌握財經生活資訊，即Like「蘋果ATM」fb專頁啦！
http://fb.com/appledailyatm