俗語有云：「樹大招風」，呢句話最啱套用喺行政會議召集人梁振英身上。何解？CY成日招惹是非囉。繼早排佢同屋企人歐遊時被同機乘客指佢撻朵、但獲空姐平反之後，噚日八方又收到老友報料，話目擊CY同幾個人去日本，同行嘅一位女士排隊過關時，唔理日本移民局官員嘅指示，夾硬行優先通道，失禮人。
據八方呢位朋友講，噚日朝早9點15分搭國泰CX504班機去東京，日本時間下晝3點左右抵達成田機場，排隊等候辦理入境手續時，發現排喺前面幾個身位嘅，就係着住西裝恤衫、但冇打呔嘅CY。睇真啲，佢見CY同行仲有兩位女士同一個10幾歲嘅少年，其中一位女士望落去大概40幾歲，另一個係妙齡少女，其間CY同個後生女特別好傾。

去過東京嘅人都知，入境大堂通常會有個日本移民局職員，指示你行埋邊個櫃位過關。當時，CY被分流到6號櫃位，中年女子同妙齡少女就分別被叫去2號同3號位，而隔鄰嘅1號櫃位就係優先通道。正當輪到中年女子過關之際，佢突然改行到1號櫃位辦手續，但在場嘅移民局職員即刻截住佢，仲好大聲咁講：「HereisJapan.Youmustfollowtherule！」（這裏是日本，你必須遵守規定！）
中年女子唔知係咪聽唔明日本人嘅英文，不但冇理會，仲叫埋排喺3號位嘅妙齡少女一齊過關。八方老友當時見到CY面色一沉，用眼神向兩位女士示意唔好搞咁多嘢，但兩位女士冇理佢，順利過關。不過，過咗關之後，妙齡少女失去蹤影，剩番CY同個中年女士同少年等攞行李。

據老友提供嘅鬆郁矇相片，嗰位女士唔似係CY嘅太太。八方本來想打電話問吓CY嘅助手，究竟CY同行嘅係邊位貴親，但CY助手話唔會回應呢啲咁嘅嘢。咁又係嘅，清者自清，以CY嘅人品修養，佢同佢嘅家人點會喺大庭廣眾做出啲失儀嘅事吖。除咗樹大招風呢個解釋外，迷信啲嘅就會話CY眉粗兼鼻孔外露，易惹是非呀，唔係點會CY次次出埠，都會有路人甲乙丙打嚟畀八方報料，話見到CY乜乜物物吖，連八方都覺得好煩呀。