立法會三日兩夜打壓公投世博考察團早車去晚機返，議員噚晚返歸，五個主角，即係白鴿黨五個議員，不負阿爺統戰厚望，全程大叫祖國好、香港好，入到中國館嗌嘆為觀止，去到香港館叫好嘢，上海嘅河蟹輕易馴服幾隻白鴿，嗯，應該係醉鴿先啱。

寶哥哥同細佬報仇

呢道上海醉鴿，喺前日下晝上枱。話說星期日香港駐上海經貿辦請議員食晏，由於都係自己人，冇內地官員在場，大家熟不拘禮，摸住酒杯底吹水，飲多兩杯，銀行家東亞李國寶同白鴿黨張文光講，你係教育界議員，以前成日「蝦」我細佬李國章，你都糟質得佢多嘞，今次正好報仇。
寶哥哥講得好認真，旁人煽風點火即刻叫侍應斟酒，據在場嘅謝偉俊直擊，張文光同寶哥哥嚟真咁杯杯清互劈，其他白鴿黨議員又幫忙頂酒，連同其他議員，食餐晏仔啫，咁就報銷10支紅酒，估唔到大家酒量咁好。謝偉俊可能少埋堆，議員平日開會，喺立法會宴會廳食飯都會開酒，「中指黃」黃宜弘被譽為立法會「酒仙」，面紅紅落樓並唔罕見。
飲咗咁多酒，謝偉俊笑言幾個泛民議員變晒醉鴿貓貓哋，更搞爛gag稱，如果煲呔家陣拎政改方案上立法會表決，曾鈺成唔使辭職都肯定通過到！全人類都笑晒，最燦爛嗰個梗係曾鈺成啦。呢個考察團河蟹與醉鴿同行，白鴿黨李華明更形容係一次成功嘅考察，佢話會爭取冇回鄉證議員日後亦可獲准北上了解國情喎。
白鴿黨議員出發前表明想自由行，總算滿足到呢個願望，有機會離隊喺上海市內觀光，涂謹申更加喺街頭同上海市民傾偈，佢覺得上海人敢言；張文光就抱怨訪問時間太短，唔係睇唔晒景點，只係走馬看花難以了解內地人生活。

葉劉彈香港館輸蝕

其他議員做花瓶任務完成，葉劉淑儀睇完動畫版《清明上河圖》，對香港館由頭彈到尾，指展品「唔係咁精采，不過不失。」外形輸畀澳門館，唔夠創意，亦冇提供遠景，其他國家展館都好有前瞻性。

mailto:[email protected]