國泰七七七航機,喺曼谷起飛,個引擎爆出火星,跟住金屬導管脫落,跌落地面兩架車車頂,有驚無險!
在殖民地時代,國泰由太古獨資,飛行平穩安全,重變咗全球數一數二嘅航空名牌,三萬哩高空,可靠、舒適、歎世界,唔知點解,近年頻頻有事,又喱又嚕!
有一種講法:話一個地方若然受到大陸影響,一定會陀衰地運!例如香港,九七前係東方之珠,舉世讚頌,九七後就當堂失色,任憑啲老左點樣賴老英埋地雷、或者董團夥磨合未成功,總之就係一換咗支旗,即時全線死火!
國泰亦似乎唔例外:英資太古臨九七,賣咁部份股份畀中資,一有中資入侵,咁喺玄學上,當堂就改變咗氣數命運嘅分子結構!唔知係咪啲中方管理,水質同本來嗰隻相沖,總之基因一旦改造,跟住就有好多唔同!
國泰飛行咗成幾十年,有幾何好似𠵱家咁,呢處爆一團火屎,嗰頭又鬆咁幾粒螺絲!若然係有啲外資加入咗,搞到搭沉船,咁就要改組股本,唔好咁「愛國」,因為人命關天!