【新增內容】
韓國6人女團A Pink即將推出回歸專輯《Pink Up》，近日密密現身做宣傳，不過接連遭到死亡威脅，繼本月14號遭男粉絲死亡威脅，男粉絲揚言要用刀捅死A Pink成員後，本周一A Pink再受到第二次死亡威脅，被同一名男狂迷指要喺A Pink新碟Showcase上放置炸彈，企圖炸死A Pink成員。

兩次死亡威脅A Pink方面都有報警處理，當時警方指：「今次嘅恐嚇犯與上次恐嚇將殺害A Pink嘅男子為同一人，在上次嘅恐嚇事件之後，該名男狂迷持續進行多次恐嚇。警方表示該男子身處加拿大，目前已投入相關調查中。」而事後A Pink亦如常舉行showcase。

不過今日上午，警方再次接到報案，有人表示要喺KBS音樂節目《音樂銀行》上炸死A Pink，又指喺現場設置咗爆炸物，警方接報後即派出警員到KBS汝矣島新館了解情況，並即時疏散150名歌手及觀眾，警方表示：「正在調查中，如果冇異常就會以虛假舉報佢檢控佢。」警方亦估計今次死亡威脅屬同一人所為。

而KBS方面就指：「錄影現場嘅歌手同粉絲已經轉移到安全地方，目前警方嘅搜查已結束，搜查結果並未發現異常情況，所以今日嘅錄影同直播將照常進行。」

至於A Pink方面就指至今仍未捉到疑犯令佢哋都好着急，現時A Pink正在休息室休息中，對於影響到其他歌手大感抱歉。

另外，根據江南警察局方面表示，佢哋已得知疑犯目前正身在海外，稍後會召開新聞發佈會說明情況，而《音樂銀行》方面亦恢復綵排，有望如常於今日香港時間下午4時進行直播。同時有韓媒亦報道上月有三名不明人士涉嫌盜用工作人員證件進入MBC《音樂中心》綵排現場，對於保安漏洞，MBC電視台方面指因為錄製節目時有不同人士進出，有時難以逐一檢查清楚，但以後亦會加強保安，避免同類事件發生。