日本女星上戶彩主演嘅人氣劇《晝顏》添食開拍電影版，今日佢孖住男主角齋藤工趁住新片開畫到戲院謝票，仲有拍檔平山浩行、伊藤步及導致西谷弘齊齊現身。

電影版《晝顏》故事發生在劇集版嘅3年後，上戶彩飾演嘅不倫人妻木下紗和已經離婚，而齋藤工就同老婆繼續過平淡生活，今次交代兩位主角重逢再續前緣。近年傳出婚變嘅上戶彩，最近自爆當初獲斟拍劇集版《晝顏》時相當抗拒，自言唔擅長演愛情故事，加上又係個偷食故事，令佢當時已有辭演打算。上戶彩繼日前上節目談到婚外情已成社會問題，佢仲話唔知幾時會發生喺自己身上。

今日活動，上戶彩似乎終於爆煲，佢剖白呢三年演繹紗和呢個不倫戀角色令佢感到痛苦，好拍檔齋藤工即暖男上身，唔止拎出手巾仔俾拍檔抹眼淚，並大讚彩妹拍攝時好關心別人，就算背負呢次作品嘅包袱，反而會問候每個工作人員，佢嘅正能量好令人佩服。彩妹聽到後即刻話：「齋藤先生於拍攝現場都很支持我。」而且仲感動到哭成淚人，彩妹坦言每日思想上都被「不倫」纏擾，同時與紗和告別亦感到可惜，覺得接拍《晝顏》都好幸福。齋藤工為博紅顏一笑，立即扮除衫來緩和氣氛。