2017年F1賽季下月底就會喺墨爾本揭開序幕，車隊亦磨拳擦掌陸續「新車落地」，其中雷諾車隊周二喺英國公佈自回歸F1後首次全權設計、組裝嘅新車R.S.17，並由今年加盟嘅德國車手侯根保同英國車手柏爾默主持揭幕儀式，同時宣佈委任四屆世界冠軍、有「教授」之稱嘅普斯特（Alain Prost）為特別顧問。

技術總監比爾揚言喺新季改制下有力改善去年全季只得8分排車隊榜第9位嘅表現，甚至以前5為目標！雖然同紅牛使用同款引擎嘅雷諾，喺引擎表現向來遠比平治輸蝕，但車隊透露喺冬休期間研發出每圈快0.3秒嘅成果，難怪對今季充滿期待。