亞視臨時清盤人德勤上周為了保障亞視員工而遣散,強調非刻意「熄機」,豈料德勤與司榮彬旗下的中國文化傳媒達成協議,亞視投資者需要在昨晚限期內,分兩期過數在德勤指定的戶口,同意以為可以營運至4月1日,惟德勤稱仍未收到300萬元過數,而司榮彬一方則指,德勤是「變態」,揚言已過數,就算錢銀都有「羅生門」,股東代表何子慧更向法院申請終止德勤當亞視臨時清盤人。
面對「亞視永恆」這個神話,亞洲電視準備「熄」又不用「熄」,臨時清盤人德勤昨晚發聲明,由司榮彬掌控的中國文化傳媒在限期前未能將800萬元支付予亞視,疑再度「走數」,德勤指會考慮採取一切適當行動,意味亞視又隨時面臨熄機!
今日亞視留守的員工亦如常回大埔總台上班,採訪車亦有出車,德勤員工都抵亞視,另有5名勞工處職員坐的士到場,未知今日是否真係熄大掣。
另外,約早上11時20分,有亞視「篋男」之稱的員工譚先生,早前聲稱爸爸喺亞視做了30多年,未出世已食「亞視飯」,選擇留守,今日佢都有返工,問佢係咪去完法院?點睇亞視可能提早停播?佢一直保持微笑,未有回應便入內。