謝雪心早前接受到商台接受梁泰來節目《1圈圈 星光背後》訪問，佢重提自己喺11歲，因為一次籌款演出獲兩位恩師任劍輝及白雪仙賞識而加入雛鳳鳴劇團，不過，後來因為自覺已屆適婚年齡，遂與喺泳隊結識嘅老公結婚。不過，由於當時嘅風氣並唔興偶像拍拖、結婚，所以當時逆水而行嘅心姐毅然退出劇團，佢話當時原來傷得兩位恩師好深。

心姐話：「我覺得冇理由結咗婚就唔可以做戲，但到結咗婚，我又會諗生小孩嘅事，所以經過6年時間，做完我嗰個階段該做嘅事，我就再出來工作。我返嚟時第一時間同任姐、仙姐講，然後任姐望住仙姐既唔係話Yes或No，而係話『我哋嘅心願也總算了結』，當時我真係唔知點算好，原來自己毅然退出都傷害得佢哋都幾深。雖然佢哋栽培得我唔算係成材，但起碼有起色，外面嘅觀眾都受落，所以佢哋會覺得可惜。」

任姐1989年病逝，心姐當然傷心，加上佢爸爸亦喺相隔一年左右離世，所以任姐仙遊，對心姐嚟講係雙重打擊，佢亦因為決意轉當文武生，將傷痛投放喺任姐嘅舞台藝術之中，心姐話：「曾經喺我返嚟做戲時，習慣咗任姐同爸爸坐喺觀眾席某個位置，一睇，見唔到！雖然觀眾拍手掌，但佢哋越拍，我個心就越痛，因為任姐同爸爸都睇唔到，唔知啲掌聲係為乜，所以我曾經一度唔想再演戲，但回心一諗就覺得任姐同爸爸都唔會想我唔演戲，咁樣會浪費咗任姐栽培，加上我當時係中性訓練，我嘅底功冇分男女，而且對任姐言行舉止耳濡目染，於是我喺92年轉做文武生。」

不過，任姐嘅離世，最傷一定係仙姐，心姐話：「任姐走咗，仙姐一定會傷心，雖然當時我哋年紀都算輕，但都會明白。任姐以前經常唱《火網梵宮十四年》嘅一句『有今生唧，邊處重有來世吖，唉…』當時我只當呢句係曲咁練，但後來深深體會到呢一點。而且見到仙姐，我就知道喊唔係最傷心，係喊都喊唔出就能體會到撕心裂肺，呢個狀況維持咗真係好耐，係你哋諗唔到咁耐。有時我哋會去仙姐屋企，佢會自己喺房唱歌，我相信嗰個感覺就好似佢同任姐傾偈一樣。」

精選娛聞，喺晒《娛果》
http://fb.com/appledailyent