炒飯哥羅理雅係今季公認騎功好又有鬥志嘅騎師，可惜炒飯哥經常因陣上過勇，阻人犯規被罰停賽，繼早前跨年停賽12個賽日兼共被罰款九萬後，剛周三（15日）夜馬尾場騎「海利多」又出事，被判停賽三個賽日及罰款10萬元。停賽期間又冇收入，加埋幾重損失，都咪話佢唔入肉。

好多馬迷對炒飯哥讚不絕口，對比暮氣沉沉嘅杜利萊，同埋贏馬一條龍、輸馬一條蟲嘅柏寶，炒飯哥確係值得捧場。馬迷好實際同公道，對騎師係咪全力以赴心裏有數，炒飯哥呢種不惜犯規搏馬嘅騎師，公眾必定欣賞。

騎師陣上不小心策騎阻到人，被競賽小組罰停賽罰錢絕對合理。不過，騎師喺被罰嘅心理陰影下，有時喺關鍵時刻攞位，亦難免有猶豫同保留。而且經常被罰停賽，客觀上亦打沉咗呢啲騎師嘅鬥志同佢哋嘅狀態，復出後好多時騎到患得患失，今季羅理雅同蘇兆輝，都有類似嘅情況。

咪以為騎師罰十萬八萬濕濕碎，特別係大騎師，每個賽日罰款上限達六萬蚊，累積停賽多嘅郁吓都過10萬找數，被罰私下真係牙痛咁聲。以心為心，若競賽小組班受薪董事每逢監察有甩漏都要罰錢，睇怕一樣嗌救命。

無可否認，喺鼓勵騎師拼搏，同警惕陣上犯規方面，好難攞到平衡，但係競賽小組都可以諗吓，對於一啲唔係太嚴重嘅干擾，係咪可以考慮酌情處分，咪罰得咁重手？

阿Joe