港股波濤洶湧，噚日再創出今年反彈新高，卒之在連升7日後，出現期望已久的調整，恒指收市跌301點，仍守在17000大關之上，期指則大低水270多點。
恒指昨天曾衝上17685，上升近300點，但受250日線（17418）所阻而掉頭回落，急升後又到了重要阻力位，調整係好正常，成交大升到921億元，趁高位沽貨者眾，但一樣有唔少人看好，仲大手吸納。
事實上，大市市底好強，今次調整幅度唔會大，第一個可能性係回一回就上；第二個可能性係由高位計回番1000到1200點，即恒指再跌多500至700點。要記住，大市未升完，調整係低吸最佳機會，一到位就要買。
大市谷咗咁多日，市勢已「㷫烚烚」，雖然調整，但上升正股仍超過460多隻，頭50大上升股，幅度由12%到88%，若以日中高位計，升幅更加犀利。
落後股紛紛發力，黃金集團（1031）急升後調整，噚日升勢再起，可以留意。
上周三，黃金集團一支大陽燭飆上去，由14仙急衝上20仙，以6000多萬股大成交衝破250日線（18.2仙）阻力，跟住在250日線水平爭持兩日，噚日升勢再起，收19.1仙，升0.9仙，升幅4.9%，成交亦回升到5800多萬股，一衝破上周四的21.3仙高位阻力，即確認開展新升浪，第一個目標係29仙，升5成；下一個目標係每股NAV38.1仙。

黃金集團在澳門擁有兩間酒店和博彩業務，08年（12月年結）由盈轉虧1.8億元，主要係為物業及投資作出重估之未變現虧損，係大勢所趨，但踏入09年，情況已有明顯改善，實質利好消息係澳門賭業上月毛利同比雖仍下跌，但已比預期為佳。
至於市場傳聞，亦屬利好。消息指中央將會再放寬自由行，為下任特首造勢，此舉猶如對澳門博彩業打下一支強心針，大大偏低的股價亦可重上升途。
08年底，黃金集團股東資金28.22億元，每股NAV38.1仙，股價折讓一半，有吸引力。大摩上月底已看好澳門博彩及房地產業前景，指澳門到訪旅客及博彩收入均有改善，料今年下半年可恢復上升。
郭兆誠