【是日必炒】三隻藥股IPO 影子股點揀？
蘋果日報 2020/06/15 07:56
魏力
港股「行三步退兩步」已是家常便飯，一來舊經濟股太多，不合時宜；二來無自己貨幣政策，經濟跟大陸，利率就跟美國，步伐失調是死症；三來中美關係惡化，香港成為兩國開拖戰場，好易變炮灰。
散戶最鍾意望恒指上落，但其實對荷包意義不大，炒股不炒市，老套但實用，集中精神搵高增長行業，再跟北水流向炒作，成功率會高得多。近日疫情再成市場焦點，令人以為是第二波爆發。其實武肺根本無消失過，只係之前狂炒反彈暫時唔理住，家陣出貨就搬番出來而已。
疫情纏繞近半年，生活、工作模式已見大改變，隨時是永久性的「範式轉移」──外賣食多咗，在家辦公成為日常，線上醫療亦加速普及，不會因為疫情稍退、疫苗出現而「回到從前」，帶來理想的中線投資潛力。
短線而言，本周三隻藥股招股：腫瘤放射治療股海吉亞、醫械股康基醫療，以及B股永泰生物，一眾影子股又有機會。從走勢分析，上日創收市新高的沛嘉醫療（9996），蟹貨極少、貨源歸邊，首十家券商持股83.17%；小時圖沿10小時線穩步向上，今轉先上望歷史高位31.25元。
本人為證監會持牌人，持有沛嘉醫療財務權益。
-----------------------------
-----------------------------
